Şəxsiyyət vəsiqəsində milli kimlik niyə qeyd edilmir?

Azərbaycanda şəxsiyyət vəsiqəsinin forması və üzərində olan məlumatların dairəsi dəyişir.

Bu, Milli Məclisdə üçüncü oxunuşda qəbul edilən “Azərbaycan Respublikası vətəndaşının şəxsiyyət vəsiqəsi haqqında” qanuna təklif olunan dəyişiklikdə əksini tapıb.

Dəyişiklik Azərbaycan Respublikası vətəndaşının şəxsiyyət vəsiqəsinin Beynəlxalq Mülki Aviasiya Təşkilatının (İCAO) 9303 nömrəli standartının tələblərinə uyğunlaşdırılması, həmçinin şəxsiyyət vəsiqəsinin istifadəsi üzrə yaranmış bəzi çətinliklərin aradan qaldırılması məqsədilə təklif olunur.

Şəxsiyyət vəsiqəsinin üzərində şəxsin ünvanı barədə məlumatın əks olunmaması vəsiqənin istifadəsi üzrə bəzi çətinliklərə səbəb olur. Bu baxımdan, şəxsiyyət vəsiqəsinin formasında və üzərində olan məlumatların dairəsində dəyişiklik edilməsi zərurəti yaranıb. Buna görə də şəxsiyyət vəsiqəsində əks olunan məlumatların tərkibinin yenilənməsi təklif olunub.

Təklif olunan digər dəyişiklik ondan ibarətdir ki, vətəndaşın ailə vəziyyəti, valideynləri, uşaqları, hərbi vəzifəsi və digər məlumatlar artıq birbaşa elektron daşıyıcıda deyil, IAMAS (idarələrarası avtomatlaşdırılmış məlumat-axtarış sistemi) vasitəsilə saxlanılacaq və kriptoqrafik mühafizə olunacaq. Şəxsiyyət vəsiqəsi ilə bağlı məlumatların kriptoqrafik mühafizəsi onların məxfiliyinin, bütövlüyünün və icazəsiz müdaxilədən qorunmasının təmin olunması məqsədini daşıyır.
Maraqlıdır ki, şəxsiyyət vəsiqəsində milli kimlik barədə məlumat yoxdur. Kimin hansı xalqın nümayəndəsi olması qeyd edilmir.

Mövzu ilə bağlı News365.az-a danışan Millət vəkili Elşad Musayev bildirib ki, şəxsiyyət vəsiqəsinə yeni məlumatlar daxil edildi:

“Bu beynəlxalq tələblərlə bağlıdır. Amma şəxsiyyət vəsiqəsində milli kimliyin yazılıb, yazılmaması barədə dəqiq bilgim yoxdur. Amma mən bir Türk kimi şəxsiyyət vəsiqəsinə milli kimlik haqqında məlumatın daxil edilməsinin tərəfdarıyam.Hər kəs öz milli kimliyi ilə fəxr etməlidir.Necə ki, biz Azərbaycan Türkü olaraq milli kimliyimizlə fəxr edirik.Əminəm ki, ölkəmizdə yaşayan bütün vətəndaşlar da öz milli kimlikləri ilə qürur duyur.Ümumilikdə isə hər birimiz Azərbaycan vətəndaşı olmağımızla fəxr edirik. Ona görə də hesab edirəm ki, şəxsiyyət vəsiqəsinə milli kimlik barədə məlumatın daxil edilməsi problem yaratmaz”.

News365.az